101 МОНСТЕР ТАЙ УСЬОЄ ШТО ТЫ ЗА НИХ МАЄШ ЗНАТИ
Як по правді взират монстер? Ци думали-сте даколи за йсе? Утвітити буде тяжко пак бо существує повно вшелиякых монстру!
У подакотрых сут дві очи, а в подакотрых три тай даже май бурш. А в дакотрых око лиш єдно. У єдных монстру острі друбні зубикы, а в другых — грубі клынцакы. А щи сут домак беззубі гикой малі діти! Еґзистувут монстры из крыльми, из рогами, из тыкалами авадь вустиками на голові. Єдні потворы прикрыті мнягков приємнов серстив, у другых кожа товста ги в слону. А подакотрі изовсім лускаті ги крокоділы.
Дакотрі потворы доста читаво пужавут, каммай у потемку. Айбо аж ся д ним приникати та май бурш їх доста благі.
В ушиткых монстру є єдна обща риса: они фурт голодні! Исі створы дуже йзідні! Они люблят усьоє што ся зачинат на букву М: маршмелов, морков, мармаладу, мед, мраморный фанок, муслі тай маракуйовоє морожено. Кой монстры їдят та они муркотят «м-м-м…», а кой ся наіли та гойкавут: «М-м-мало!!!».
Што пак люблят пити монстры? Но ай як молока тай морковляного соку пак бо они тоже ся зачинавут из буквы М.
Монстры нарушавут правило лиш кой діло ся кыват кіфлику. Слово ся не зачинат из М айбо монстры обожавут кіфликы. Човколадні, ґлазуровані, из лекваром… Там, де живут монстры фурт повно кріхотя.
Живут монстры в пещерах. У пудземных авадь у камінных дись у горах, у пудводных авадь у вчиненых из парен тай поплону.
Подаколи саморобні пещеры вни чинят на деревах авадь на подах у хыжах.
У пещерах монстрам добре, тепло тай усе в них глота. Аж существам потемно та вни вішавут лампочкы. А аж пещера ім стає погузка та монстры строят ищи єдну ци гладавут май грубу.
Подакотрі монстры живут из свойов файтов, другі — из цімборами. Монстры люблят бисідовати тай обожавут кой ушиткі довкола ся шінітавут, кывавут тай є ся з кым бавити.
Монстрячі діти кличут малыми монстриками. Они ся люблят бавити ціцы (доганячкы) тай прятанкы. А подаколи монстрикы искапчувут обі дві бавкы у ракаш: тогды треба шіковно тікати тай ся прятати, а кой тя найдут та маймай наскоро тікати та прятати ся дись инде.
Бавок ипен монстрикам богужаль ниє та завто малинькым существам ся дуже люблят людські. Кой монстрик иде попри дьитинської хыжі, у котруй повно красных бавок што лежат без діла, тяжко му ся здержати. Монстрик забігат до хыжі, хапле бавочку тай ся з нив пряче. А мы вже знаєме што прятати ся монстрикы знавут добре!
Малинькі створы направду знавут аж бавлінку треба уддати, бо набізуно ї дале будут глядати. Завто кой ся монстрик из нив набавит та вертат бавочку на місто. Ун забігат до хыжі, кладе ї там де была, убігат гет та маймай ся пряче. Ци было з тобов хоть даколи такоє што бавка ищезала, а дале ся нагле находила на другум місті? Годно быти аж нив ся лиш побавив монстрик.
Увичері монстрикы читаво вморені уд біганя за динь тай уд часу до часу снут варе-де. На щастя малі годні спати хоть у якуй полозі тіла. А старі забиравут свою дітвачню та несут на постількы.
Кой монстры-родителі проходят попри дьитинської хыжі, они все провірявут и людську дьитину, котра там спит. Аж она ся розкрыла из пуд поплона та монстер ї годен прикрыти. А кой видит аж дьитині ся снит штось страшноє та кладе юй на чоло свої малинькі лабкы. У лабках ся указує сердце, котроє ся світит. Сяк монстер перемінює поганый сон та файный. Лишек тогды кой дьитинка впят супокуйно заспит, монстры-родителі идут дале глядати свойих малых котрі тоже дись сплят.
Сплят монстры обычно цілов файтов на великуй общуй постели. Сяк їм дуже добре. Лиш на постели усе такый галаман. Кой монстры сплят та фурт собов сувавут, утігавут рукы тай лабы, крыла тай тыкала. Завто ткось из них годен упасти з постели вночи, ненароком ся закачуляти пуд постіль тай просто си спати дале. До кунця и из далека мож учути як монстер спит, завто што ун дуже голосно храпит. Но вже малинькі монстрикы годні лиш даколи тихинько сапіти.
КУРТЫЙ ВСТУП ДО АНАТОМІЇ МОНСТРА
Дяку монстра мож порозуміти за вустиками на його голові: радусный монстер, зажуреный, влюбеный, зачудованый, обиженый.
Крыла.
У монстру годні быти рузні филі крыл: ги в оваду (інсекту), ги пера пропелера, ги крыла упыря, из пірьом ги в потят авадь саморобні крыла.
Рогы.
У подакотрых монстру сут рогы. Годно быти што исе скапчано из єднорожцями ци шарканями (драконами).
Очи.
Монстры видят у потемку. Они провіряют ци всьоє добре з дітьми тай несут сплячых монстру на свої постількы.
Зубы.
Много в котрых монстру острі малинькі зубикы. Они люблят лишати ними сліды на столах ци на книжках.
Лабы.
Монстры ся валовшні дерти варе-куды свойими нухтиками вадь сысаками (укр. присосками) на лабках.
Хобот.
У котрых монстру сут хоботы, у тых особеный пах на файні ідеї.
Пличі.
Без розділа ци они порослі серстив, ци на плечох у них тирня, а ци кожа в них товста ги в слона: ушиткым монстрам ся любит кой іх шупавут за плечикы.
Жолудок.
Жолудок монстра робит гикой компост. Дожджові червакы ідят усьоє што туды попадат тай переварювут исе на глину. Завто монстры фурт голодні. А місто того обы ходити у тоалету, они просто чинят ракашикы глины на грядках.
МОНСТРЯЧА ОШКОЛА
Так ипен ги й людські діти, малинькі монстрикы мавут ходити в школу. Айбо израна вни такі уморені што волівут каммай довго спати. Завто ся прячут — у сюм монстрикы майстры. Лиш родителі їх и так усе находят, бо пак самі колись были малыми та тямлят прятанкы из свого дітоцтва. Позад сього наука ся зачинат нараз чим посліднього монстрика найдут та приведут у школу.
Учителі-монстры указувут ученикам як обґаздовати пещеру. А ищи як учинити файні грядкы из косичками ци урожайом из тої зимлі, котра ся подаколи усыпат из монстрикової гузичкы.
Монстрикы из довгыма нухтьома ци з сысаками учат ся на уроках скалолізаня, а створы из крыльми — на уроках літаня. Ученикам ся каммай люблят урокы музикы. Завто што там повно співавут тай игравут.
А што дівут монстры-родителі докуть діти їм у вошколі? Майперш доростлым ся треба улежати на постелях обы удыйти уд гляданя діти тай пути у школу. Май потум они печут мраморні кіфликы тай фанкы, варят леквар тай избиравут морков, маракую и другі плоды. Но пак айяк ищи дозиравут монстродіти.
Монстродіти дуже солодкі! Малинькі, из великыма очима, усьоє тягнут у рот тай грызут. Щастя што в них раз ниє зубу, бо инак бы ушитко тай дуже скоро погрызли.
Кажджый місяць появлявут ся нові монстродіти. Яйця из безміря (космоса) на Зимлю привозит ракета. Доростлі монстры идут на місто приставаня тай розбиравут исі яйця межи собов. По дакулькох дньох удты ся вылуплят монстрикы, а годувати їх будут молоком из скляничок.
Зубы тай крыла у монстру уроставут даґде в гуд. Айбо раз исе щи молочні зубы тай какао-крыла. Они упадувут гет кой приходит час дустати постоянні. Родителі избиравут молочні зубикы свойих діточок у баночкы та ними ся дале бавлят монстродіти. А какао-крыльми парадят пещеру, бо они так красно покліпковувут у потемку.
Кой у монстру недобра дяка та вни ростут. У добруй дяці они ги все, дуже малинькі тай милі. Айбо аж, уповішме, изломити їхню пещеру авадь їх розмириґовати, монстры ся чинят штодале май великі, и май великі, и май великі…
Мáй грубый монстер котрого даколи виділи быв великый гикой пуднимальный кран! Усьоє спозад того што ун истратив свою любену парночку, молоко у скляничци му збрескло, а ланч-бокс упав на зимлю тай усі дарабы морквичкы ся пороссыпали.
Завто што монстер и так уже быв доста великый уд злости, ун бурш не годен быв ся прятати кой ся бавив из другыми монстрами, пак бо все го находили першого. Исе щи май читаво му згуршило дяку — тай ун маймай пудрус.
Аж ты даколи стрітиш такого великого монстра та не пужай ся. Наперекор тому же монстер на вид свадливый тай злый, ун по правді просто без доброї дякы. Аж ты ся насмілиш тай побайлуєш му помочи, створа ся зась измаліє. Як исе вчинити? Ты маєш быти из монстром дуже-дуже чесным. Майперш го посилуй заісти чогось доброго. Уже знаєш што люблят монстры істи. Тогды-сь го годен пошупати за плечикы. Усі монстры исе обожавут. Даколи вонь годні замуркотіти. А щи-сь му годен зановтити співанку. Монстры люблят музику. «Танець малинькых качат» їхня майлюбена пісня аж и співати, и играти нараз.
Типирькы ты знаєш за монстру вшитко тай годно быти такоє, што будеш хотіти ся з ними побавити. Айбо вни ся зуправді знавут дуже файно прятати та тобі їх раз буде треба найти. Аж ты посилуєш монстрикови бавочку, ун ся точно не вдержит. Ци-сь годен ушорити тай обґаздовати пещеру из поплону. Монстры будут хотіти там жити цілов файтов. Лиш не забудь што вни дуже голосно храплят уночи. Но завто ти ся бурш ніґда нич страшноє не приснит.
«101 монстр і все, що варто про них знати!»
Німицькоє выданя «101 Monster und alles, was du über sie wissen musst!»
Ruby van der Bogen, 2024